Please scroll down for English

Enwi enillwyr Gwobr Tîm y Flwyddyn Llyfrgell Cymru ar gyfer 2022

Mae CILIP Cymru Wales yn falch iawn o gyhoeddi enillwyr Gwobr Tîm y Flwyddyn Llyfrgell Cymru 2022: Grŵp hyfforddi, Gwasanaeth Llyfrgell a Gwybodaeth GIG Cymru/e-lyfrgell GIG Cymru. Gwnaeth Jason Thomas, Cyfarwyddwr, Diwylliant, Chwaraeon a Thwristiaeth, Llywodraeth Cymru, y cyhoeddiad yn ystod Cyfarfod Cyffredinol Blynyddol CILIP Cymru Wales ac achlysur gwobrwyo Tîm y Flwyddyn ar ddydd Iau 10 Tachwedd 2022. Dyfarnwyd yr ail safle i dîm Ymgysylltu Academaidd Prifysgol Aberystwyth.

Bod yn ystwyth yn llyfrgelloedd y GIG ledled Cymru

Grŵp hyfforddi, Gwasanaeth Llyfrgell a Gwybodaeth GIG Cymru/e-lyfrgell GIG Cymru, a enwebwyd gan Susan Prosser, yw enillydd Gwobr Tîm y Flwyddyn Llyfrgell Cymru 2022. Mae Gwasanaeth Llyfrgell a Gwybodaeth GIG Cymru (NHS WLKS) yn rhwydwaith o 24 o lyfrgelloedd wedi'u lleoli mewn ysbytai ledled Cymru sy'n gwasanaethu pob disgyblaeth a sector iechyd.

Fel llawer o bobl, mae staff llyfrgelloedd GIG Cymru wedi bod yn gweithio dan amodau anodd yn ystod pandemig COVID-19. Roedd angen cyfleoedd hyfforddi mwy hyblyg ar lawer o staff gofal iechyd gan nad oeddent yn gallu gadael eu gweithleoedd. Ymatebodd Gwasanaeth Llyfrgell a Gwybodaeth GIG Cymru (NHS WLKS) i’r her gan ddatblygu rhaglen hyfforddi genedlaethol o bell newydd ar gyfer eu defnyddwyr amrywiol. Gyda'i hagwedd hyblyg yn cydnabod bod yn rhaid i glinigwyr ganfod lle ar gyfer yr hyfforddiant yn eu hamserlen feichus, cafodd y rhaglen hyfforddi lefel uchel o ganmoliaeth ac adborth gan y rhai a’i mynychodd.

Dyfyniad gan arweinydd y prosiect neu Susan Prosser: Rwy’n falch iawn o glywed bod y cydweithio rhwng Llyfrgelloedd GIG Cymru a’r e-lyfrgell wedi’i gydnabod gyda’r wobr hon am eu rhaglen arloesol o hyfforddiant byw a ddarparwyd i staff y GIG ledled Cymru. Gweithiodd y tîm yn hynod o galed i sicrhau bod y rhain yn cael eu cyflwyno ac roedd yr adborth yn hynod gadarnhaol. Mae'r wobr yn hwb mawr i forâl!

Cyflwynwyd Gwobr Tîm y Flwyddyn Llyfrgell Cymru gan Jason Thomas, Cyfarwyddwr, Diwylliant, Chwaraeon a Thwristiaeth yn Niwrnod Agored a Chyfarfod Cyffredinol Blynyddol CILIP Cymru Wales ar ddydd Iau 10 Tachwedd 2022 oedd yn dathlu llwyddiannau proffesiynol eithriadol gan dimau sy’n gweithio o fewn gwasanaethau llyfrgell a gwybodaeth yng Nghymru.

Fel cyflwynydd Gwobr Tîm y Flwyddyn Llyfrgell Cymru , dywedodd Jason: “ “Roeddwn yn falch iawn o gael gwahoddiad i gyhoeddi enillwyr Gwobrau Tîm y Flwyddyn Llyfrgell Cymru. Hoffwn ddiolch yn fawr iawn i holl staff y llyfrgell sy'n gweithio'n hynod o galed i ddarparu gwasanaethau gwych i unigolion a chymunedau. Rwy'n gweld yr ymroddiad hwn drosof fy hun yn fy llyfrgell leol a gwn ei fod hynny’n cael ei ailadrodd ledled y wlad.

Mae’r rhaglen hyfforddi a ddarperir gan Wasanaeth Llyfrgell a Gwybodaeth GIG Cymru yn enghraifft wych o sut mae llyfrgellwyr yn chwarae rhan mor werthfawr wrth gefnogi unigolion yn eu dysgu proffesiynol. Fe wnaeth y fenter ragorol hon helpu clinigwyr sy’n gweithio ar draws GIG Cymru i wella eu gwybodaeth a’u sgiliau ar adeg dyngedfennol. Dangosodd staff llyfrgelloedd y GIG ystwythder, dyfeisgarwch, ac ymrwymiad mawr i'w defnyddwyr wrth ddatblygu'r rhaglen arloesol yma. Maent yn llwyr deilyngu’r wobr hon”

Ychwanegodd Cadeirydd CILIP Cymru Wales, Lou Peck, “Bob blwyddyn rwy'n cael fy atgoffa am y gymuned lyfrgell anhygoel a gwerthfawr sydd gennym yma yng Nghymru.

Mae Gwobr Tîm y Flwyddyn Llyfrgell Cymru yn gyfle i dimau llyfrgelloedd ledled Cymru dynnu sylw at eu llwyddiannau ac unrhyw wersi a ddysgwyd. Mae'n gyfle gwych i gael cipolwg ar brosiectau sy'n mynd rhagddynt, na fyddem yn clywed amdanynt fel arall.

Llongyfarchiadau mawr i bawb a gymerodd ran yn y Wobr eleni gan ddangos ystwythder, arloesedd a dulliau cynaliadwy o sicrhau gwasanaethau llyfrgell hanfodol ar gyfer y dyfodol”.

Panel beirniaid Tîm y Flwyddyn Llyfrgell Cymru CILIP Cymru Wales 2022

Gwnaeth y pedwar enwebiad argraff ar feirniaid 2022, gan amlygu’r gwaith rhagorol sy’n digwydd ar draws llyfrgelloedd Cymru:

• Robin Armstrong Viner, Cyfarwyddwr Cyswllt: Pennaeth Llyfrgelloedd, Prifysgol Abertawe
• Andrew Eynon, Rheolwr Llyfrgell a TGD, Grŵp Llandrillo Menai
• Helgard Krause, Prif Weithredwr, Cyngor Llyfrau Cymru

Sylw’r beirniaid: “Mae staff llyfrgelloedd y GIG yng Nghymru wedi bod yn gweithio dan amodau heriol yn ystod pandemig COVID-19 ac roedd hwn yn enwebiad cryf yn cyflwyno achos cadarn iawn dros pam mae’r tîm yn haeddu’r wobr hon. Datblygodd y tîm raglen hyfforddi newydd gan ddechrau o’r dechrau, yn ystod cyfnod heriol i staff y GIG, a chyflwynwyd y rhaglen i grŵp amrywiol o ddefnyddwyr. Roedd yr enwebiad yn cynnwys enghreifftiau o adborth defnyddwyr a oedd yn dangos bod cynnwys yr hyfforddiant a'r dull cyflwyno yn bodloni anghenion defnyddwyr ac wedi arwain at lefelau uchel o foddhad ymhlith y rhai a’i mynychodd. Llwyddiant y rhaglen oedd hyblygrwydd yr amseriad a'r dyddiadau gan gydnabod yr angen i glinigwyr ganfod lle ar gyfer yr hyfforddiant mewn amserlen brysur, yn ogystal â'r arddangosiadau byw a rhyngweithio gyda'r mynychwyr.

Uwchsgilio myfyrwyr gydag adnoddau dwyieithog cryno sy'n rhwydd i fyfyrwyr eu defnyddio

Dyfarnodd y beirniaid yr ail safle a gwobr ariannol o £350 i dîm Ymgysylltu Academaidd Prifysgol Aberystwyth, a enwebwyd gan Lloyd Roderick.

Gall yr arfer o ddarparu dyfyniadau a chyfeirnodi cywir ar gyfer aseiniadau prifysgol fod yn brofiad sy’n peri braw i lawer o fyfyrwyr. Er mwyn codi ymwybyddiaeth o theori ac arfer dyfynnu a chyfeirnodi cywir, adeiladodd y tîm Ymgysylltu Academaidd ganllaw llyfrgell dwyieithog (Cymraeg a Saesneg) oedd yn cynnwys amrywiaeth gynhwysfawr o adnoddau cryno sy’n addas i fyfyrwyr gyda’r nod o geisio lleihau’r pryder sy’n aml yn gysylltiedig â chyfeirnodi.

Dyfyniad gan Lloyd Roderick: “Bu’r Tîm Ymgysylltu Academaidd ym Mhrifysgol Aberystwyth yn gweithio’n galed i ddatblygu, adeiladu, profi, lansio, a hyrwyddo’r Canllaw a Chwis ar Ymwybyddiaeth Cyfeirnodi a Llên-ladrad, ac rydym wedi bod yn falch iawn o’r ymateb iddo gan fyfyrwyr a staff ar draws y brifysgol. Mae cael y gwaith hwn wedi’i gydnabod gan wobr gan CILIP Cymru Wales yn benllanw gwych i’r prosiect.”

Dywedodd y beirniaid: “Cynlluniodd y tîm adnodd hyfforddi newydd ar gyfer cyfeirnodi. Mae'r adnodd yn rhyngweithiol ac yn gwbl ddwyieithog, wedi'i integreiddio i systemau dysgu myfyrwyr a gellir ei deilwra i wahanol anghenion myfyrwyr. Roedd llwyddiant datblygiad yr adnoddau hyfforddi newydd hyn yn cydnabod bod cyflwyno llwyddiannus yn dibynnu ar gael y defnyddwyr i gymryd rhan. Roedd yn amlwg bod gan y tîm ddealltwriaeth wirioneddol o sut y byddai myfyrwyr yn ymwneud â'r cynnwys a beth fyddai'n lleihau pryder wrth gyfeirnodi. Mae'r enwebiad yn disgrifio sut y bu i'r tîm gydweithio'n dda ar draws y brifysgol. Roedd yr adnodd newydd yn allbwn prosiect llwyddiannus, ond y canlyniad cadarnhaol arall oedd y partneriaethau a ddatblygwyd ar draws y brifysgol a fydd yn codi proffil y llyfrgell”.